संकटमोचन हनुमानाष्टक - Sankatmochan Hanumanashtak (गोस्वामी तुलसीदास कृत)

बाल समय रबि भक्षी लियो तब, तीनहुँ लोक भयो अँधियारो ।

ताहि सों त्रास भयो जग को, यह संकट काहु सों जात न टारो ।।

देवन आनि करी बिनती तब, छाँड़ि दियो रबि कष्ट निवारो ।

को नहीं जानत है जग में कपि, संकट मोचन नाम तिहारो ।।

बालि की त्रास कपीस बसै गिरि, जात महाप्रभु पंथ निहारो ।

चौंकि महा मुनि शाप दियो तब, चाहिय कौन बिचार बिचारो ।।

कै द्विज रूप लिवाय महाप्रभु, सो तुम दास के सोक निवारो ।

को नहीं जानत है जग में कपि, संकट मोचन नाम तिहारो ।।

अंगद के सँग लेन गये सिय, खोज कपीस यह बैन उचारो ।

जीवत ना बचिहौ हम सो जु, बिना सुधि लाए इहाँ पगु धारौ ।।

हेरि थके तट सिंधु सबै तब, लाय सिया-सुधि प्रान उबारों ।

को नहीं जानत है जग में कपि, संकट मोचन नाम तिहारो ।।

रावन त्रास दई सिय को तब, राक्षसि सों कहि सोक निवारो ।

ताहि समय हनुमान महाप्रभु, जाय महा रजनीचर मारो ।।

चाहत सिय असोक सो आगि सु, दै प्रभु मुद्रिका सोक निवारो ।

को नहीं जानत है जग में कपि, संकट मोचन नाम तिहारो ।।

बान लग्यो उर लछिमन के तब, प्रान तजे सुत रावन मारो ।

लै गृह बैद्य सुषेन समेत, तबै गिरि द्रोन सु बीर उपारो ।।

आनि सजीवन हाथ दई तब, लछिमन के तुम प्रान उबारो ।

को नहीं जानत है जग में कपि, संकट मोचन नाम तिहारो ।।

रावन जुद्ध अजान कियो तब, नाग कि फाँस सबै सिर डारो ।

श्री रघुनाथ समेत सबै दल, मोह भयो यह संकट भारो ।।

आनि खगेस तबै हनुमान जु, बंधन काटि सुत्रास निवारो ।

को नहीं जानत है जग में कपि, संकट मोचन नाम तिहारो ।।

बंधु समेत जबै अहिरावन, लै रघुनाथ पताल सिधारो ।

देबिहिं पूजि भली बिधि सों बलि, देउ सबै मिलि मंत्र बिचारो ।।

जाय सहाय भयो तब ही, अहिरावन सैन्य समेत सँहारो ।

को नहीं जानत है जग में कपि, संकट मोचन नाम तिहारो ।।

काज किये बड देवन के तुम, बीर महाप्रभु देखि बिचारो ।

कौन सो संकट मोर गरीब को, जो तुमसों नहि जात है टारो ।।

बैगि हरौ हनुमान महाप्रभु, जो कछु संकट होय हमारो ।

को नहीं जानत है जग में कपि, संकट मोचन नाम तिहारो ।।

।। दोहा ।।

लाल देह लाली लसे ,अरु धरि लाल लँगूर ।

बज्र देह दानव दलन,जय जय जय कपि सूर ।।

।। इति संकटमोचन हनुमानाष्टक सम्पूर्ण ।।

कोई तन दुःखी, कोई मन दुःखी, कोई धन बिन रहत उदास ।
थोडे थोडे सब दुःखी, एक सुखी राम का दास ।।